Custa est s’istòria de Còsima e de s’annu prus memoràbile de sa vida sua, cuddu in ue lompet is degheot’annos e ddis sutzedent “cosas meda pro sa prima o pro s’ùrtima borta”. Còsima est una bisadora, finas dae cando est pitica bivet intro is libros, antis torrat in literadura totu su chi dda inghìriat, e gasi fintzas is cosas prus mìseras a traessu de is ogros suos devenint poèticas e dèchidas. E su matessi faghet su babbu, unu idealista sena cura chi afrontat sa poberesa cun alligria, mentras sa mama traballat pro mantènnere a totu sa famìlia e si disisperat ca in bidda mìmulant chi sunt gente de pagu, gentixedda. Fintzas a cando non si detzident a lassare su sartu e a si mòvere a Casteddu, chi est a probe. Inoghe, a Còsima ddi praghet meda a andare a su Poetu e frecuentare su litzeu clàssicu, in ue tenet una prof de lìteras chi dda indànimat a iscrìere e a cunsiderare Calvino, Shakespeare e Deledda comente unos amigos, e unu cumpàngiu de classe chi òdiat a is ricos e bisat de trasformare sa Sardigna in sa Cuba de su Mediterràneu. Ma Còsima intendet a s’ispissu sa nostalgia de sa bidda, e durante una de is bìsitas incue adòbiat a Costantinu, unu pastore cirrudu e turmentadu chi tenet sa passione de sonare s’organeddu. Issu ddi paret bellu meda, ddoe bidet a s’Heathcliff de Cimetempestose in issu e, mancari siat istada avèrtia dae su mègius amigu suo, si nd’amorat sena iscampu. Cando su mundu beru cumentzat a apretare cun is problemas suos, Còsima at a èssere custrinta a nde calare dae s’àrbore in ue diat coladu totu sa vida cun praghere, comente a una baronessa rampante. Dd’at a tocare de prantare is pees in terra e proare a cumprèndere ite tipu de adulta bolet devènnere e a cale amore bolet pònnere in fatu.
De custa tensione universale intre su disìgiu de bisare e su bisòngiu de istare in sa realidade si nudrit s’iscritura de Milena Agus, lìmpida e aèrea ma fintzas frutu de una chirca linguìstica profunda: sa mirada sua, originale e belle de pitzinna, faghet rìere e meravigiare a su matessi tempus, comente a bortas sutzedet cando is pipios o is sàbios narant sa beridade.
