Il Crogiuolo est una cumpangia de professionistas de s’ispetàculu, chi òperat in domo Saddi in bia Fieramosca 17 in Pirri. Fundadu in su 1982 dae Mario Faticoni chi nd’est istadu diretore artìsticu e presidente fintzas a abrile de su 2017, Il Crogiuolo, dirìgidu como dae Rita Atzeri, mirat a una lìnia de produtzione artìstica ligada a is temàticas de s’aficu tzivile e sotziale. Sa denominatzione cumpleta de sa cumpangia est, difatis, Il Crogiuolo tzentru de interventu teatrale. Su teatru tenet, in sa bisione nostra, su còmpitu istòricu – culturale de ofèrrere a su pùblicu unu intèrpretu de su cuntemporàneu. Orgòlliu de sa cumpangia est sa produtzione de ispetàculos in prima natzionale assoluta comente a “La serra” de Pinter , “Dialogo” de Ginzburg, “Sculacciando la cameriera” de Coover e galu in annos reghentes s’anteprima de “L’erodiade” cun Maria Paiato regia de Pierpaolo Sepe, sa coprodutzione cun is Filodrammàticos de Milanu pro s’ispetàculu “Formidabili quegli anni” de Mario Capanna cun Giulio Casale, “Fuochi” testu e regia de Serena Sinigaglia cun Iaia Forte e Rita Atzeri, s’anteprima de “La terra degli uomini tore”, testu de Marco Taddei cun Arianna Scommegna. Sa cumpangia in prus de sa produtzione e distributzione de is ispetàculos suos, organizat rassegnas de prosa e teatru pro pitzocos, fèstival, cursos de formatzione e laboratòrios teatrales.